D’an 18 a viz Even                 Prest da vont er straedoù!

                Echu eo gant an dilennadegoù ; cheñchet ‘vo liv d’ar c’hambr, roz e oa, glas a vo… met teñval dazont hon yezhoù bihan niver atav.

Petra ‘zo da c’hortoz ? Krouiñ ur c’hwec’hvet Republik? Cheñch ar Vonreizh? Marteze, met ne vo ket evidomp e vo cheñchet... nemet ma vijemp kapapl da gas miliadoù a dud er straedoù!

Testennoù nevez a zo bet krouet gant Jack Lang; n’int ket lezennoù met ur paz war-raok eo memes tra… gant ma pado!

Krouet zo bet ur genstrivadeg ispisial e penn kentañ ar bloaz, da lâret eo danvezioù ouzhpenn ha mat pell zo!

Lâret zo bet gant UGB pegen dañjerus eo spered ar genstrivadeg „ispisial“-se. Hag amañ emaomp degouezhet : keñveriañ notennoù danvez kelennerion ar skolioù divyezhek ha danvez kelennerien ar skolioù... e matematik hag e galleg... ha n’eo ket e brezhoneg evel just ha dont a-benn da lakaat danvez kelennerien nevez da vezañ korbellet!

84 den o deus tremenet ar genstrivadeg ispisial er servij publik : ne chom nemet 24 danvez kelenner ar skolioù divyezhek... evit 24 flas... – iskisat ! - ha gwashoc’h zo ! Ne vo ket tu da zigeriñ al listenn gortoz evit dont a-benn da stankañ an toulloù chomet goude an eil fiñvadeg...

Sellet ‘vo pizh ganeomp ouzh reolennoù an Deskadurezh Stad ha dre vras ouzh reolennoù ar c’henstrivadegoù er Servij Publik evit gwelout hag-eñ eo reizh an dro fripon-se!

Ne vo ket laosket Pennoù Bras an Deskadurezh ober ar pezh a garont. Ezhomm hon eus eus kelennerion ar skolioù stummet ! 24 flas er c’honkour publik zo bet lakaet ; ret eo kaout 24 studier en IUFM ‘benn bloaz ! … ha dont a-benn da zigeriñ al listenn gortoz evit reiñ ur chañs ouzhpenn da dud ’zo da vezañ stummet ar bloaz war-lerc’h.

Forzh penaos e vo ezhomm bras en dazont deus kelennerien ar skolioù e Breizh pa soñjer ‘barzh an holl re a zo o vont war o leve... Neuze e vo degemeret kelennerien ar skolioù o tont eus akademiezhoù all… hep goulenn diganto peseurt notenn o deus bet er genstrivadeg…

Ur wezh e-barzh an Ti Bras, n’eus forzh !!!

Neuze tudoù, arabat en em chalañ atav !!! Gwelloc’h vo deoc’h mont en un akademiezh all, tremen ar genstrivadeg e lec’h e vez aesoc’h ha dont en-dro da Vreizh evit tapout ur post divyezhek...

Ar genstivadeg ispisial ne servijo ket mui (ouf! Un danvez ouzhpenn ha lore ebet!), an IUFM/CFEB kennebeut... ha gwell a-se rak n’ez eus post ebet krouet evit-se.

Lojik an Deskadurezh Stad.

Komzet hon eus a-walc’h… gant re nebeut a zisoc’hoù ha n’eo ket al liv roz pe c’hlas a cheñcho kalz a dra.

Tost echu eo ar bloavezh skol ha diaes e vo bremañ da stourmiñ holl a-gevret, met ret e vo bezañ prest diouzhtu d’an adkrog-skol da sevel hon mouezh e pep lec’h, er straedoù, er mediaoù ha marteze gant devezhioù dilabour evit diskouez splann pegen didalvoud eo bet testennoù Jack Lang ha lâret kreñv ur wezh ouzhpenn hag adarre : gwir lezenn ebet evit ar yezhoù bihan niver, cheñchamant ebet, nag er vuhez pemdez hag en endro, nag er skolioù!

                                                                                         Armelle Ar C’hozh

Heuliit ar c’heleier war hon lec’hienn: ugbrezhoneg.com