2003 / 2004 : ur bloavezh iskis

Gouzout a ouiemp holl e vije bet ur bloavezh a-bouez e-keñver ar politikerezh e Breizh.

Evel just n’eo ket UGB un aozadur politikel pa vez anv eus strolladoù politikel en un doare strizh. Koulskoude ar pezh a reomp bemdez  a zo politikerezh.

Marteze n’eo ket bet gwelet UGB e-giz ur gevredigezh o skoazellañ strollad pe strollad war an dachenn, met kalzik ac’hanomp o deus kemeret perzh en emvodoù prientiñ dilennadegoù ar Rannvro memes tra. Pep hini en deus gellet degas e vouezh gant ma ned ae ket a-enep diazezoù UGB (a zo hag a zo bet atav a-enep mennozhioù an tu-dehoù pellañ da skwer).

Savet hon eus goulennoù asambles gant Kuzul Sevenadurel Breizh digant an danvez-kuzulierien ; gant KSB c'hoazh hon eus savet ur raktres (stagadenn unan).

Gant ar strollad nevez dilennet e sav ur spi nevez ; ur skipailh liesliv eo, gant tud tomm o c’halon ouzh ar yezh, dizingal ivez e-keñver pouez ar strolladoù politikel a vez kavet enni.

Deomp-ni da bouezañ evit ma vefe degemeret ar pep brasañ eus hor c’hinnigoù.

Gouzout a ouzomp mat peseurt pouez a zo gant Pennoù Bras Paris er strolladoù e-giz an hini nevez dilennet (koulz hag en hini kozh !). Ret e deomp reiñ da glevet mouezh ar Vretoned.

Ar brasañ dañjer a oa tro-dro deomp en deus diskouezet e fri diouzhtu goude an dilennadegoù : bezañ techet da sachañ pep hini war e du.

Aesoc’h eo bezañ unvan pa vez enebourien dirak,… kalz diaesoc’h p'en devez c’hoant pep hini da dennañ e damm gounid diouzh an araokadennoù a c’hellfe bezañ graet.

Savet hon boa en nevezamzer 2003 ur plañ diorren an deskadurezh divyezhek, sinet gant Div Yezh, Diwan, Dihun hag UGB e-barzh komision deskadurezh KSB.

Ur skrid hag hon eus bet mil mizer da gas anezhañ da benn, cheñch ger-mañ-ger, ur virgulenn a-wezhioù….

Met evit UGB ez eus anezhañ ur gwir diazez evit ar stourm, gant ur sell hollek war an traoù, ambisius ha pleustrek war an dro.

Ne oa ket ar memes ton gant an holl ha dreist-holl – ret eo en lâret – gant Div Yezh a gave kalz efedusoc’h labourat e diabarzh an deskadurezh Stad asambles gant ar sindikadoù, laosken ar plañ a-gostez ha klask tennañ traoùigoù diwar ar gevrat steuñv kozh hag ar CALR.

Ar strategiezh a oa hon hini adalek 2003, lakaet da get diouzhtu goude an dilennadegoù…. !!!

Evit UGB ne oa ket dav mont d’ar CALR e miz Even ken. Evit diskouez ne oamp ket a-du ? Evit marc’hata bruzun gant ar rektor ?

Evit Jean-Do eta ne oa ket posupl chom e penn komision deskadurezh KSB kement ha ken bihan ma en deus roet e zilez.

Lonket e vez nerzh gant seurt dizemglevioù !

Bremañ ez a an traoù war sioulaat ; klask a ra Daniel Kernalegenn sammañ war e chouk labour ponner komision deskadurezh KSB.

Emvodoù hon eus bet e penn kentañ ar bloavezh skol. Sklaer eo evit an holl : chom a ra ar plañ diorren diazez ar stourm evit an holl, hag ar pal boutin klask tapout treuzkas galloudoù eus ar Stad d’ar Rannvro.

Er fin emaon o tont eus Bro Elzas e lec’h eo bet dalc’het « kentañ kendalc’h evit ar gelennerien divyezhek er c’hentañ derez ». Pal ar c’hendalc’h a oa goulenn ur statud ispisial evit ar gelennerien divyezhek. Pedet e oa UGB da lâret he soñj. (eil stagadenn)

Ne oa ket UGB war ar memes linenn hag ar re all : n’eo ket er mor e-touez ar c’hranked e vo kavet brezhonegerien a-vihanik !!! Evel just e c’hell Elzasiz, Katalaniz, Euskariz, mont da glask kelennerien en tu all d’an harzoù ha gant ar sistem ur mestr/ur yezh krouiñ ur gwir vicher. Petra hor bije ni da c’hounit ? nemet disfiz a vije, muioc’h c’hoazh, marteze ….

Kemer a ra perzh UGB e buhez ar vro dre an emglevioù bro e lec’h ez eus izili o chom, e-giz Ti ar Vro e Kemper, Ti Bro Leon, Ti Bro Lesneven, Skeudenn Bro Roazhon pe c’hoazh Al Levrig e Bro Dreger. Kemeret hon eus perzh e krouidigezh Startijenn, kengevredigezh ar Vro Vigoudenn. Dre ar c’hevredigezhioù e c’hellomp gwriat liammoù kreñv a-benn reiñ d’ar yezh ur gwir plas er bed sevenadurel e Breizh.

War an dachenn hon eus ranket stourm ivez evit lakaat digeriñ postoù nevez, koulz er c’hentañ hag en eil derez.

Estreget ar c’hudennoù a vez kavet e pep lec’h, siwazh, en deus kemeret pep hini ac’hanomp er c’huzul merañ un teuliad e karg :

- Jean Michel ha Gabi evit ar skolioù en deskadurezh katolik.

- Ninnog ha Maryvonne evit Diwan.

- Alan en deus heuliet teuliad an eil derez koulz e anv UGB hag e anv SKKEAB.

- Silvi, Stefan ha Jean Do o deus graet war-dro teuliad ponner ar mizoù skoliata etre ar c’humunioù.

- Anna a ra war-dro « Deskiñ ».

- Kannadig a zo deuet er maez daoust d’ar c’hudennoù a bep seurt hon eus bet. Startijenn n’hon eus ket bet a-walc’h evit lakaat buhez el lec’hienn.

Ur bloavezh gwisket ganti mantell ar politikerezh a oa 2004.

Ra vo 2005 hini ar c’helenn.

Raktres evit ar bloavezh 2004 / 2005

1. Sevel ur plañ diorren evit ar c’helenn divyezhek

Stagadenn 1 : mennad ar vodadeg veur

- Sevel kartenn ar skolioù divyezhek, dreist-holl evit an deskadurezh-Stad, hag en ur gemer e kont ar skolioù all ; krouiñ ur rouedad.

- Labourat war un hentad a yafe eus ar skol vamm d’ar skolaj ha betek al lise.

- Mont war-raok gant an teuliad  « mizoù-skoliata ».

2. Sevel un darvoud micherel

Raktres Studi ha Dudi, asambles gant Kelenn, CFP, CFEB, DAO.

Stagadenn 2 : rentañ-kont an emvod kentañ.

Adsevel liammoù kreñv etre ar skolaerien, ar gelennerien hag ar glaskerien war an danvez kelenn, hag ar mod da gelenn.